Amrywiaeth ac algorithmau – holi Prif Weithredwr newydd S4C

Un o’r pethau cyntaf y caf ei wybod gan Geraint Evans wrth inni sgwrsio ar Zoom ganol mis Ionawr, cwta wythnos wedi iddo ddechrau yn ei swydd newydd fel Prif Weithredwr S4C, yw ei fod, fel dau o’i ragflaenwyr yn y swydd, yn fab i weinidog. Galwedigaeth ei dad sydd i’w gyfrif fod ganddo adnabyddiaeth plentyn, o leiaf, o sawl man yng Nghymru. Cafodd ei eni ym mans Capel y Crwys, Abertawe, neu’r Three Crosses – un o gapeli’r Annibynwyr oedd yn achos Cymraeg ar y pryd. Treuliodd gyfnodau hwy wedyn yn Nhrawsfynydd a Llanbrynmair, cyn i’r teulu symud yn ôl i lawr i ardal Abertawe, i Bontarddulais y tro hwn, pan oedd yn rhyw 9 oed. A’r Bont oedd ei gartref wedyn hyd nes iddo fynd i’r coleg. Mae’n amlwg ei fod yn falch o’i gysylltiad â phob un o’r lleoedd hyn. Mae’n falch ei fod wedi cael cyfle i ddod i adnabod y cymunedau, yn enwedig Llanbrynmair a Phontarddulais lle treuliodd y cyfnodau hiraf.