Aneifeiliaid a moesoldeb

Ro’n i o flaen y Senedd yn ddiweddar, yn gwisgo fy het ymddiriedolwr elusen Achub Milgwn Cymru, yn lobïo efo criw o garedigion y milgi dros wahardd y rasio yng Nghymru. Ac yn llythrennol wrth imi sgwennu’r llith hwn, fe dorrodd y newyddion y bydd hynny’n digwydd. Newyddion da o lawenydd mawr! Bu ymgyrch Cut the Chase yn cael ei hyrwyddo gan Achub Milgwn Cymru, yr RSCPA, Blue Cross a’r Dogs Trust, a phob tro dwi wedi siarad efo pobol am rasio milgwn maen nhw’n rhyfeddu ei fod o’n dal i ddigwydd. Mae’n weithgarwch sydd mor anghydnaws efo’n dealltwriaeth ni heddiw o sut mae cŵn yn haeddu cael eu trin, a dim ond mewn deg gwlad yn y byd y mae rasio milgwn yn dal i ddigwydd – naw gwlad, unwaith y daw gwaharddiad Cymru i rym.