Barddoniaeth, bywyd a balans – sgwrs â Meleri Davies

Ar ddechrau’r flwyddyn dwi’n llwyddo i gyfweld â Meleri dros Zoom, ac yn gefndir i ni’n dwy mae silffoedd llyfrau ein swyddfeydd cartref. A hithau’n dod dros annwyd cas, dwi’n ddiolchgar iddi am wneud amser ar ddiwedd diwrnod gwaith i gael sgwrs am ei chyfrol o farddoniaeth gyntaf, Rhuo ei distawrwydd hi. Mae’r sgwrs yn llifo’n braf a Meleri yn amlwg wrth ei bodd yn trafod ei gwaith creadigol o’i chartref yn Nyffryn Ogwen. Er bod Meleri wedi bod yn ysgrifennu ers blynyddoedd, dim ond yn ddiweddar y dechreuodd rannu ei gwaith yn gyhoeddus. ‘Dwi ’di bod yn sgwennu erioed,’ meddai, ‘jest bod y sgwennu ’di bod yn rhywbeth personol – sgwennu dyddiaduron, cerddi, ond byth yn dangos nhw i neb.’