Creadigaethau cynnar hanesydd celf

Mae Pethau Cudd yn deitl addas i’r arddangosfa sydd i’w gweld ar hyn o bryd yng Nghanolfan Grefft Rhuthun. Dyma sioe sy’n gofnod o hanes gwaith celf a chrefft yr hanesydd Peter Lord. Mae Jill Piercy, curadur yr arddangosfa, wedi llwyddo i grynhoi cerfluniau a chyfrolau bychain, darluniau a gwaith enamel, sy’n olrhain gyrfa artistig y gŵr arbennig hwn – y gŵr sydd bellach wedi hen ennill ei le fel yr awdurdod ar ddiwylliant gweledol Cymru. Wrth gamu dros drothwy’r oriel, yn croesawu’r ymwelydd mewn cês persbecs mae 19 o gyhoeddiadau, rhai tenau a rhai trwchus, o eiddo Peter Lord – sef llyfryddiaeth weledol o’i holl waith o 1992 hyd heddiw. Y peth nesaf i ddenu’r llygaid yw tŵr lliwgar Y Plentyn Glân (c.1984) sydd wedi’i ysbrydoli gan ddelweddau cardiau Tarot. Ynghyd â’r haul, y lleuad a’r sêr, mae’r adeiladwaith o blatiau enamel yn cynnwys dynionach a golygfeydd sy’n cyfleu’r ymryson, yr ymbalfalu a’r dyfalu sydd ynghlwm â thaith bywyd.