‘Croesi Traethau’

Mae pob un o’r peintiadau a’r cerfluniau a fydd i’w gweld tan ddechrau’r flwyddyn nesaf yn Oriel Kyffin Williams, a leolir y tu mewn i Oriel Môn, wedi dod o gasgliad preifat syfrdanol. Casglwyd y cyfan, yn agos i 90 o weithiau celf, gan Sian a Ken Owen dros gyfnod o 30 mlynedd a’u harddangos i gyd yn eu cartref ar arfordir dwyreiniol Môn. Fe ddechreuodd y cyfan yn 1990, yn fuan ar ôl iddyn nhw briodi. Ar ymweliad ag Oriel Plas Glyn-y-Weddw yn Llŷn cyfareddwyd y ddau gan ‘Traeth Gwyllt’, dehongliad tawel ond taer Selwyn Jones o’r olygfa o ochrau Brynsiencyn dros afon Menai tuag at Eryri. ‘Roedden ni’n meddwl ein bod ni’n bobol soffistigedig dros ben,’ meddai Ken gan wenu’n atgofus. Ceisio osgoi bod yn ymhonnus mae o, gan wybod yn iawn pa mor hawdd yw ymddangos yn siwdaidd wrth drafod gweithiau celf. Ond y gwirionedd yw bod gan y pâr ifanc a brynodd y llun cyntaf hwnnw chwaeth gadarn.