Croeso i fyd Uwch Dros y Pysgod

Wedi i ni ddyfarnu bod y man cwrdd gwreiddiol yn rhy swnllyd, rydw i a Dafydd Owain yn penderfynu ar far Eidalaidd ei naws yng nghanol Caerdydd, gan setlo ar fwrdd yn llygad yr haul ar ôl codi dau beint o gwrw. Yn union wrth ein hymyl mae yna gogydd (sydd hefyd yn digwydd bod yn aelod o fand Cymraeg) yn paratoi llysiau i’w rhostio dros dân agored. Ar ôl i ni dderbyn addysg werthfawr ynglŷn â sut i goginio asbaragys a dysgu hefyd mai celeriac ydi’r enw ar wreiddyn seleri, mae’n bryd dechrau ar y cyfweliad. Mae’n siŵr ei bod hi’n swnio fel sgwrs go od i unrhyw un a ddigwyddodd ei chlywed hi, wrth i mi holi Dafydd ynglŷn â phentref dychmygol Uwch Dros y Pysgod, sy’n rhoi ei deitl i albwm unigol newydd y cerddor sy’n gyn-aelod o fandiau fel Palenco, Jen Jeniro ac Eitha Tal Ffranco.