Cyfoeth Clecs y Rhondda

Mae Cwm Rhondda’n enwog am ei byllau glo gynt, am yr ‘aur du’ y tyrrodd cynifer o bob man yma i’w gloddio. Ond mae’n enwog hefyd, hyd heddiw, am ei bobl a’u hoffter o rannu straeon. Mae gan bawb yn y Rhondda stori i’w hadrodd a honno fel arfer yn rhyfeddach na ffuglen. Rydw i’n dod o Dreorci’n wreiddiol, lle sy’n adnabyddus am ei gôr meibion, am yr albwm enwog Max Boyce: Live at Treorchy, am ennill gwobr Stryd Fawr y Flwyddyn cyn y cyfnod clo. Ac os ewch chi am dro ar hyd y stryd honno fe welwch bobl yn cymryd oesoedd i siopa gan eu bod nhw’n aros i sgwrsio gyda hwn a’r llall mor aml. Yn sgil ymweliad yr Eisteddfod â Rhondda Cynon Taf eleni, meddyliais mai peth da fyddai atgoffa gweddill pobl Cymru am ein stori ni. Wedi’r cyfan, ein stori ni yw eich stori chi.