Dwyn creadigol i ddathlu archif Sain

Mae gwrando ar yr albwm Tyrchu Sain fel bod mewn breuddwyd sain, os oes y fath beth. Fel ym mhob breuddwyd, mae pethau’n gyfarwydd ac anghyfarwydd yr un pryd, yn llithro i mewn ac allan o’ch gafael. Rydych yn nabod ambell ddarn o gân neu riff yma ac acw ond mae’r darnau hynny wedi’u cymysgu efo pethau eraill, yn synau a rhythmau a churiadau newydd electronaidd o bob math. Croeso i fyd Don Leisure. Ef yw’r dyn sydd wedi bod yn ‘tyrchu’ trwy gatalog y cwmni recordiau annibynnol hynaf yng Nghymru er mwyn creu taith sonig liwgar, droellog a chynhyrfus ar ffurf ugain o draciau. Cerddor, artist ‘bît’, cynhyrchydd a DJ yw Aly Jamal sy’n byw yng Nghaerdydd ac yn gweithio o dan yr enw Don Leisure. Mae’n egluro, gyda gwên, ei fod wedi ‘dwyn’ yr enw hwnnw chwarter canrif yn ôl gan siop peiriannau hapchwarae yn y ddinas am ei fod yn ei daro fel un doniol.