Ffermwyr a’r dreth etifeddiaeth

Dydi ffermwyr ddim yn enwog am fod yn fodlon a hapus eu byd ond mae gen i gydymdeimlad mawr efo nhw fel criw. Mae ffermio yn waith anodd, ac mae’r ffermwyr ar drugaredd y farchnad, a’r archfarchnadoedd yn benodol. Fodd bynnag, dydi fy nghydymdeimlad ddim yn ymestyn i’w protestiadau diweddar yn erbyn dod â ffermydd yn rhan o gyfundrefn y dreth etifeddiaeth, y gyfundrefn honno y mae pawb arall sy’n berchen eiddo yn rhan ohoni. Dros y blynyddoedd gwelais bob math o brotestiadau, ac yn ddieithriad gwraidd pob un oedd bod y protestwyr yn cael eu trin, neu’n tybio eu bod yn cael eu trin, yn wahanol i’r trwch neu’n llai ffafriol na hwy. Ond protest ddiweddaraf y ffermwyr yw’r gyntaf erioed imi ei gweld lle mae rhywrai’n cwyno am fod bwriad i’w trin yr un fath â phawb arall.