Gaza – galw am gadoediad parhaol

Sut mae cofnodi hunllef mewn geiriau? Yn dechnegol, ystyr y gair yw breuddwyd cas ond defnyddir y term hefyd fel metaffor i ddisgrifio realiti na ellir ei ddirnad. Cofiaf y bore hwnnw, a ninnau’n trafod fel rhan o gyfarfod dyddiol tîm y wasg y diweddaraf o’r hyn yr oeddem yn ei glywed gan ein cydweithwyr yn Gaza, i mi gael fy llorio gan hanes Ahmad (newidiwyd ei enw), bachgen pum mlwydd oed oedd wedi ei ganfod yn fyw o dan rwbel ei gartref. Cafodd ei gludo dros nos i un o unedau meddygol Achub y Plant a phan ddaeth ato’i hun, y peth cyntaf a ofynnodd oedd ‘Ble mae fy nhad?’ ac ‘A fydd fy mraich yn tyfu yn ei hôl?’ Dros y pymtheng mis diwethaf mae dros filiwn o blant fel Ahmad wedi byw yr hunllef o golled, trais a thrawma a fydd yn effeithio arnynt am weddill eu hoes.