Gwell Rhyfel na Heddwch

A ydw i wedi darllen nofel Leo Tolstoy, Rhyfel a Heddwch? Er mawr gywilydd imi, nac ydw. A oes gennyf gopi ohoni? Oes. Tasg a neilltuais ar gyfer f’ymddeoliad yw mynd i’r afael â hi. Dyfalu oeddwn i, felly, faint o gynulleidfa War and Peace Opera Cenedlaethol Cymru yng Nghaerdydd oedd wedi darllen y llyfr tybed. Wrth feddwl am opera hirfaith Sergei Prokofiev, o gyfnod yr Ail Ryfel Byd, rhaid cofio y byddai cynulleidfaoedd Rwsia, dan orthrwm dieflig yn fewnol ac allanol ar y pryd, yn gyfarwydd â holl fanylion cyfoethog y llyfr ac yn debycach na ni, efallai, o sylwi ar ddiffygion amlwg yr opera. Nid yw’n syndod na fu perfformiad Cymreig cyn hyn o’r opera, o gofio mor brin fu’r perfformiadau yn Ewrop yn gyffredinol Nid yw eto wedi cyrraedd llwyfan Covent Garden yn Llundain er enghraifft. Felly roedd yn bwysig cymryd y cyfle hwn i glywed y Corws a’r Gerddorfa yn eu holl ogoniant.