Gwledd o Puccini

… Ym Mehefin eleni, er mwyn nodi canmlwyddiant marw Puccini, llwyfannodd Opera Cenedlaethol Cymru Il trittico (1918) am y tro cyntaf yn ei hanes – cyfres o dair opera un act: Il tabarro, Suor Angelica a Gianni Schicchi – gan gynnig cyfle prin i fwynhau rhai o weithiau lleiaf cyfarwydd y cyfansoddwr. Bwriad a dyhead angerddol Puccini oedd i’r Trittico gael ei lwyfannu fel cyfanwaith organig ar un noson. Ysywaeth, anaml y mae hyn wedi digwydd erioed – mae tair opera a dwy egwyl yn creu noson hir ar y naw, ac am resymau ymarferol dim ond dwy o’r tair fydd yn cyrraedd Llandudno ar 12 Hydref, sef Suor Angelica (Y Chwaer Angelica) a Gianni Schicchi. Er hynny, bydd gwledd yn disgwyl y gynulleidfa yn Venue Cymru, gyda’r naill opera’n drasiedi ddirdynnol a’r llall yn gomedi frwd ac egnïol.