Gwleidyddiaeth ’24: Goleuni yn yr hwyr?

Dwi’n gobeithio, erbyn diwedd yr erthygl hon, y gallaf grafu am ychydig o obaith am ragolygon gwleidyddol 2025. Ac mae hynny’n ddibynnol ar effaith buddugoliaeth ysgytwol Trump a gwersi ei lwyddiant i wleidyddiaeth Prydain. Yr economi oedd un o’r prif resymau dros ailethol Trump, er gwaetha’r gwelliant rhyfeddol yn ystod arlywyddiaeth Biden pan gafwyd y twf economaidd uchaf yn y G7. Ond doedd yr holl ystadegau clodwiw ar bapur yn golygu dim i bobl a welodd bris eu basged fwyd yn codi hyd at 28% ers y pandemig. Rhan bwysig o lwyddiant Trump oedd y tueddiad ar draws y byd o gael gwared â llywodraethau sydd wedi siomi’r etholwyr yn economaidd. Gwelwyd yr un siom hefyd yn India, Y Philipinau, Ariannin, Israel, a Brasil – a’r canlyniad oedd llywodraethau adain dde ‘caled’ fan lleia, os nad eithafol. A chynyddu wnaeth y gefnogaeth i’r dde mewn bron i ugain o wledydd ar draws Ewrop, gan gynnwys ym Mhrydain. Yng Nghymru hyd yn oed, daeth plaid Reform yn ail mewn 13 o etholaethau yn yr etholiad cyffredinol diwethaf.