Llenyddiaeth – lle i ddathlu

Wedi i Covid gilio, mae pawb wedi rhuthro i wneud y pethau arferol. Llyfrau, a gwyliau llyfrau, a lansio llyfrau – ac o, cymaint yr oedd rhywun yn croesawu hynny. Eto, fel un oedd yn barod i saethu’r un nesa fasa’n dweud wrtha’i i’r cyfnod clo fod yn ‘gyfle gwych ichi sgwennu’, wna’i ddim bod yn flin am y gweithiau a ymddangosodd yn sgil y pla. Aros wna’i i weld y nofelau/gweithiau a ddaw sy’n adfyfyrio ar Covid: tebyg iawn i’r cnwd o weithiau a ddaeth yn sgil dau ryfel byd. Efallai fod angen aros degawd cyn meddwl go iawn am yr hyn a’n trawodd. Ond i’r rhai hynny y rhoes y clo amser iddynt sgwennu, rydan ni’n ffodus. Mae rhai yn datgan hynny’n blaen – Bethan Gwanas efo Prawf Mot a Ffion Dafis efo Mori, Llyfr y Flwyddyn. Tydyn nhw ddim yn sôn am Y Peth, dim ond cydnabod yn ddiolchgar yr amser a roddwyd iddynt.