Mae pris i’w dalu am bopeth

Cyfaddefodd sawl gwleidydd ei bechodau yn ddiweddar. Nid wyf yn wleidydd, ond fel un sy’n honni bod yn sosialydd, teimlaf reidrwydd i gyfaddef fy mod yn berchen ar gyfranddaliadau yn y farchnad stoc. Mae’n stori hir sy’n cychwyn gyda’m taid yn buddsoddi yn ‘Beechams Pills’ cyn yr Ail Ryfel Byd. Etifeddwyd y cyfranddaliadau hyn gan fy mam a minnau yn ein tro, ac felly bu gennym ‘arian yn Beechams’ yn ddi-dor tan i’m brocer diwethaf eu gwerthu mewn camgymeriad ryw ddwy flynedd yn ôl. Roeddwn wedi cymryd yn ganiataol mai ‘gwendid’ y natur ddynol oedd chwarae’r farchnad. Fe’m calonogwyd, felly, wrth ddarllen erthygl yn Current Biology fis Mehefin yn dweud bod gan gaws llyffant yr un gwendid.