Mae hi’n ddiwrnod braf o Fai ac mae gerddi’r tai rydw i’n eu pasio i gyrraedd Plas Glyn-y-Weddw, Llanbedrog, ar eu gorau. Y tu mewn mae gwledd weledol arall yn fy aros – gwaith 11 o artistiaid o Lŷn. Mae’r cyfryngau’n amrywio – mae yma baentiadau, ffotograffiaeth, tecstiliau, ambell gerflun a mwy. Mae yma amrywiaeth hefyd o ran pwnc a thema. Dacw chwaraewr rygbi’n cael ei daclo gan ddiafol. Dacw fwrdd cegin cartrefol a’r lliain sydd drosto’n blastar o ryseitiau wedi’u teipio a nodiadau mewn llawysgrifen wedi’u hychwanegu atynt. Dacw deulu (tybed?) o Gymry a’u Cymreictod fel pe bai hanner ffordd rhwng bod yn destun balchder a bod yn fwrn arnynt (teitl y llun, fel cerdd Parry-Williams am Gymru, yw ‘Hon’). Dacw geffylau hardd, a chariad a pharch yr artist atynt yn amlwg ym mhob strôc brwsh. A dacw wlân yn cael ei ddefnyddio ar un wal mewn ffordd iwtilitaraidd fodern, ac ar wal arall mewn ffordd gynnes a chwareus. Gyda’i gilydd, mae’r gwaith yn tystio i lond penrhyn o ddawn a dychymyg.
Dyma ‘BÔN’ – arddangosfa gyntaf grŵp newydd o artistiaid o’r un enw a sefydlwyd ddwy flynedd yn ôl gan Catrin Williams, yr artist o Bwllheli.
