Morfudd a Dyddgu a fi

HOLI FFION DAFIS Fel arfer, bydd Ffion Dafis yn rhannu ei hamser rhwng Caerdydd a Dolgellau, ond mae hi’n aros mewn bwthyn yn Llandwrog ar hyn o bryd, ‘Achos dwi angen cuddiad oddi wrth y byd!’ Mae hynny yn bennaf oherwydd ei bod hi ar fin dechrau cyfarwyddo dwy bennod o Stad ac wedi bod yn paratoi neu ‘prepio’ ers tair wythnos. Ond drwy’r sgrin Zoom, mae’n cyfaddef ei bod hefyd yn nerfus oherwydd bod ei nofel gyntaf, Mori, ar fin cyrraedd y siopau. ‘Mae’n nerfusrwydd gwahanol, tydi? Mae pobol yn dal yn edrych ar ffrwyth dy lafur di, ond mae’n ddau gyfrwng hollol wahanol. Mae’r nofel wedi bod yn fy meddwl i ac yn cael ei llunio ers amser maith ond mae’r cyfarwyddo yn rhywbeth mwy byrhoedlog, ac efo’r nofel ti’n nerfus wrth feddwl tybed ydi pobol yn mynd i’w hoffi hi neu ei chasáu hi!’