Myned yn iau wrth fyned yn hŷn

Mae ‘Botox’ ac effaith y ‘gwaith’ ar olwg hon a’r llall yn bynciau na fyddent wedi bod ar gyfyl fy sgwrs i a’m cyfoedion benywaidd ddau ddegawd yn ôl, ond erbyn hyn mae’n gyffredin ac, mewn rhai cylchoedd, yn ddisgwyliedig bron i fenywod drefnu ‘tweakment’ (triniaeth fechan) cyn achlysur arbennig, boed yn briodas neu’n fedydd wyrion. Mae eraill, ar y llaw arall, yn penderfynu bod yn rhaid ceisio dileu’r rhychau uwch ben y wefus neu’r olion traed brain wrth y llygaid er mwyn dad-wneud effaith arferion drwg ieuenctid ffôl. Nid pobl mewn argyfwng canol-oed yn unig sy’n dewis cael triniaethau fel hyn. Mae yna ferched yn eu hugeiniau a’u hwynebau’n disgleirio’n ffresh yn dweud wrthyf fod cael gwaith cosmetig ar yr wyneb yn beth arferol o fewn eu criw ffrindiau; a bod yr angen i geisio osgoi edrych yn hŷn pan fyddan nhw’n hŷn yn golygu bod triniaethau sy’n cael eu marchnata fel rhai sy’n atal heneiddio’n weledol (‘preventative’) yn fwy a mwy poblogaidd.