Neges rymus y dwrn pren

‘Dim cyfiawnder. Dim heddwch.’ Dyna arwyddair arddangosfa symudol newydd sy’n cynnwys straeon actifyddion a fu, ac sy’n parhau i fod, yn rhan o’r ymgyrch Mae Bywydau Du o Bwys (Black Lives Matter) yng Nghymru: Codi Cymru. Bellach, mae’r Senedd wedi datgan y nod i Gymru fod yn wlad wrth-hiliol erbyn 2030, sy’n amcan hynod uchelgeisiol; yn rhy uchelgeisiol yn ôl rhai. Ond, mewn difri, mae angen y fath nod er mwyn ceisio gofalu am unrhyw newid cymdeithasol, wrth i bobl ymdrechu, ymgyrchu ac ymlafnio am fyd sydd â llai o wahaniaethu ac atgasedd. Mae hiliaeth wedi bod ar gynnydd yng Nghymru ers blynyddoedd ac mae casineb a rhagfarn tuag at wahanol bobl yn ein cymdeithas i’w gweld yn amlycach. Dyna pam fod Cyngor Hil Cymru wedi cydlynu’r arddangosfa yma a mynd â hi drwy’r wlad.