O Gasnewydd i Galisia

’Wy am ddechre ar y ffin, yr un sydd rhwng Cymru a Lloegr. Mae’n golygon ni ar Gasnewydd yn yr achos hwn, a chyfres ddrama newydd Ar y Ffin a fydd yn cychwyn ar S4C ddiwedd Rhagfyr. Mae Claire Lewis Jones (Erin Richards) yn fenyw ganol oed brysur sy’n gweithio fel rheolwraig mewn cwmni logisteg. Mae ganddi yrfa dda, plant sydd yn eu harddegau, gŵr cariadus ond chwit-chwat – digon o goflaid i unrhyw un – ond fel petai hynny ddim yn ddigon, mae hi hefyd yn gwirfoddoli fel ynad heddwch mewn llys yn y ddinas. Fe gawn olwg ar ei bywyd hectig a’r modd y mae hi’n llwyddo, rywsut, i gadw ei phen uwchben y dŵr. Yn gefndir anghysurus i’w hymdrech barhaus, mae mwrllwch lleidiog isfyd Casnewydd sy’n bygwth llyncu pob dim.