Onglau ar brofiad oesol

Cafodd Rhodri Jones ei ddisgrifio gan y ffotograffydd arall hwnnw o Gymro, Philip Jones Griffiths, fel ‘bardd Cymraeg efo camera’. Wrth gymryd golwg ar ei wefan mae’n hawdd deall beth sydd ganddo gan fod cymaint o enaid yn y lluniau, sy’n dangos pobl mewn sawl rhan o’r byd lle bu’n gweithio yn ystod gyrfa sy’n ymestyn yn ôl dros 35 o flynyddoedd. Mae ei luniau wedi ymddangos mewn llu o bapurau newydd a chylchgronau, mewn arddangosfeydd hwnt ac yma ac mewn llyfrau. Ar ddechrau ei yrfa treuliodd amser yn Nicaragua ac El Salvador yn ystod y rhyfeloedd yno yn y 1980au a’r 1990au. Yn ddiweddarach crwydrodd yn yr hen Iwgoslafia a chyn-wledydd yr Undeb Sofietaidd. Yna yn 1995 aeth i Tsieina gan dynnu lluniau oedd yn darlunio sefyllfa rhai o leiafrifoedd y weriniaeth yn ogystal â symudiad pobl o gefn gwlad i’r dinasoedd mawr. Fodd bynnag, ei lyfr diweddaraf yw’r un mwyaf personol o ddigon iddo’i gyhoeddi hyd yma. Mae Cofion yn deillio’n uniongyrchol o brofiad y ffotograffydd o golli ei dad yn Ionawr 2023.