Rhyddid y wasg yn Awstralia

Pan ddaeth heddlu ffederal Awstralia i stafell newyddion yr ABC yn Sydney i chwilio drwy ddogfennau ac e-byst rhai o’r newyddiadurwyr, roedd fy nghyd-weithwyr ar y ddesg dramor yn gwylio’r cyfan yn fyw ar sianel newyddion y gorfforaeth ar y rhes o sgriniau teledu uwchben. ‘Ro’n ni i gyd yn chwerthin am y peth ddoe a ’neud jôcs,’ meddai Jonathan wrtha i pan es i mewn am fy shifft arferol y bore wedyn. ‘Roedd yr hen hiwmor du Aussie yn ein cadw ni i fynd. Dim ond bore ’ma y trawodd e fi pa mor ddifrifol yw’r sefyllfa.’ Prin fod cyfryngau amrywiol Awstralia yn cytuno ar unrhyw beth, ond pan ddaeth heddlu’r AFP i gynnal cyrch ar ystafell newyddion fwyaf y darlledwr cenedlaethol, yn sydyn roedd pob cyhoeddwr mawr a phob darlledwr yn gweld y bygythiad. ‘War on Truth’ oedd pennawd y Daily Telegraph. ‘Risk of “criminalising” media’ meddai’r Australian. ‘Be concerned, state power is looking at you’ meddai’r Sydney Morning Herald.