Rhyfeddu at y byd a’i bobol – arddangosfa Jac Jones

‘Dwn i’m o le mae o’n dod.’ Mae Jac Jones yn crwydro o gwmpas yr arddangosfa o’i waith yn Storiel, Bangor, ac yn dal llygad ambell un o’i hen gymeriadau wrth wneud. ‘Sori ’mod i’n methu rhoi ateb gwell.’ Mae’n anodd crynhoi cyfraniad Jac Jones i ddiwylliant Cymru – mae o’n anfesuradwy, yn enfawr. Camp yw enwi’r un arlunydd arall sydd mor hollbresennol yn ein bywydau – yn gwenu o dudalennau ein hoff lyfrau; yn denu’n llygaid at gloriau ein hoff albyms; yn bosteri eiconig ein sioeau theatr mwyaf nodedig. Fel rhywun sydd wedi edmygu ei waith ers cyn cof, ac sy’n cydweithio â fo ar hyn o bryd, rydw i wedi bod yn rhefru ers tro fod angen cydnabod cyfraniad arlunwyr llyfrau plant lawn cymaint ag ydym yn gwneud wrth sôn am artistiaid mwy traddodiadol.