Seren Michelin i fwyty’r eithin

Y tro cyntaf i mi gael cip drwy ffenest bwyty newydd Gorse, Pontcanna, y llynedd, cododd y cogydd Tom Waters ei law arna i o’r gegin agored, cyn agor y drws a chamu allan i heulwen Pontcanna am glonc ar y palmant. Ac yntau newydd orffen arwain y shifft ginio ganol wythnos, roedd yn llawn rhyddhad i adrodd bod wythnosau cynta’r busnes wedi profi’n llwyddiant. Roedd hefyd eisiau dweud cymaint yr oedd yn mwynhau fy lluniau instagram i o fwytai ardal yr Eisteddfod, gan rannu atgof plentyndod o un o’i hoff flasau, sef sleisen gwstard o gaffi Princes, Pontypridd. Wnes i ddim synnu o gwbl felly i ddarllen geiriau un o feirniaid Michelin, a ddyfarnodd seren i fwyty Gorse mewn seremoni fawreddog yn Glasgow ym mis Chwefror – y tro cyntaf i fwyty yng Nghaerdydd dderbyn seren.