Y darnau’n dod ynghyd – holi Marian Delyth

Mae Marian Delyth yn disgrifio’r profiad o ddethol lluniau ar gyfer ei harddangosfa ddiweddaraf, sy’n cwmpasu ei holl yrfa hyd yma, fel un sydd wedi bod yn ‘bleser ac yn hunllef am yn ail’. Nid ar chwarae bach mae distyllu gwaith hanner can mlynedd i un sioe, a bu wrthi am fisoedd yn mynd trwy ei harchif gan geisio meddwl beth i’w gynnwys a sut i’w gyflwyno. Yn y diwedd daeth gweledigaeth wrth ymweld â’r oriel yn Cathays, Caerdydd, lle mae’r arddangosfa’n cael ei chynnal. ‘Mae Ffotogallery y tu ôl i gapel sy’n wynebu Heol Crwys, mewn beth oedd yn arfer bod yn Ysgol Sul. Mae e fel festri capel mawr ac ar y wal bella mae gen ti beth o bensaernïaeth capel yn dal yno. Oedd y wal yn benthyg ei hunan i thema’r capel yn ’y ngwaith i, a benderfynes i wedyn gyfyngu’n hunan i hyn a hyn o themâu.’