Yr athrylith lliwgar o La’rwst – cofio Dafydd Elis Thomas

Tra oedd y ddau ohonom yn fyfyrwyr ymchwil ym Mangor yng nghanol y 1960au buom yn rhannu fflat ar lawr gwaelod Chateau Rhianfa ar lan y Fenai rhwng Porthaethwy a Biwmares. Un o’r rheolau oedd dim partïon Prifysgol. Ar nos Wener un Steddfod Ryng-golegol ym Mangor fe gyhoeddodd Dafydd yn y Menai Vaults fod croeso i bawb i Blas Rhianfa. Cafwyd parti i’w gofio! Bore drannoeth fe ddaeth rheolwraig y plas i ymweld â’r fflat gan gyhoeddi ein bod yn cael ein taflu allan am dorri’r rheolau. Fe benderfynodd Dafydd a minnau apelio i’r perchennog, bargyfreithiwr amlwg oedd yn byw ryw filltir ar hyd y Fenai. Fe aethom yn ein dillad dydd Sul gorau i erfyn am faddeuant am ein camweddau. O fewn deg munud o araith ddiymhongar a chelfydd gan Dafydd, roedden ni nid yn unig wedi cael maddeuant ond yn rhannu potel o sieri hyfryd gyda’r perchennog. A’r cyfan oherwydd dawn Dafydd i ddwyn perswâd.